رد: ثجيل الليل
أرجوا تقبل هالزهيرات رد على رائعتك المميزة
يا صاح اني اوصيك باخلاق المكارم جلب
فكر بيها وتصير لكسور المنايب جلب
الناس ماهم سوه بيهم شريف وجلب
وبيهم تحسبه وتنسبه وللنسب ينساب
وبيهم شبيه الافاعي لو لدغ ينساب
لو سبك النذل تره ما عنده عرض ينساب
ولو عظك الجلب كولي هم تعظ الجلب
........................................
دار الملوك اظلمت عكب الضيا بسروج
والدمع من ناظري سال وجرى بسروج
والخيل لمن ترادت واظعنت بسروج
الكدش اصبح لهم عزم وشديد وباس
والزين دنك على ايد الزلم وباس
والزين لو عاشر انذال الوكت مو باس
من قلة الخيل شدوا على الجلاب سروج
............................................
هامات كبل بعلو وكت السقوط اسقطت
واخلاق بعض الربع مدري شبلاها اسقطت
ياريت ام النذل باول حملها اسقطت
من جان قطعه لحم ومن الشهور اربعه
وياحيف باع الوطن باوراق ميه اربعه
خلي الجرح بالقلب تاريخ تسعه اربعه
حتى الطفل بجه على بغداد يوم اسقطت
............................................
مليت ما عاد عندي يا رفاقه صبر
صابر على المر واجرع فوق صبري صبر
جم دوب أسعى واجد، أثمار زرعي صبر
وسيوف الأفكار تجزر بالحشاشه جزر
أحسب وافكر واخاف إيصير عندي جزر
مادام الأيام عد الناس مد أو جزر
أصبر على المر عل ما أشوف حلو الصبر
..............................................
عن حالتي لا تسل يا صاح ملوني
وبنار هجر الغضا ذولاك ملوني
تايب على حبهم ما يوم ملوني
تم القلب مبتلي وحيران وياهم
وبفراقهم مهجتي واعضاي وياهم
ذاك التعب والسهر ما فاد وياهم
لمَّن حجيت الصدق يا ناس ملوني
.......................................
دنياك ملها وفه غدّاره بالصاحب
بايّام سعدي إلي كل الخلك صاحب
لمَّن جفاني الوكت ما ظل إلي صاحب
لا تصاحب اللاش خلّه ينجلع ويروح
وصاحب الزين ما عزت عليه الروح
دار المعزة عذب قبل المذله ايروح
ويمته يدور الفلك وانعاتب الصاحب
.....................................
هذا ولكم كل الإحترام | 
أنت غير مسجل في منتديات مضايف أبناء الحسون . للتسجيل الرجاء إضغط هنـا 
إعــلانــات المضايـف
العرض العادي
